Laguntzak

Lekunberriko Alde Zaharra zaharberritzeko ordenantzaren hasierako onespena

Gizarte, kultura eta historia arloko arrazoiengatik eta guztien interesagatik, hiriko Alde Zaharra sustatzea da ordenantza honen xedea, alde zaharreko eraikinak zaharberritzeko jarduketei laguntza eta bultzada emanez.

Toki Administrazioari buruzko Foru Legearen 325 eta 326. artikuluetan ezarritakoa betez, ondotik ematen da Lekunberriko Alde Zaharra zaharberritzeko ordenantzaren testu osoa, Lekunberriko Udalak 1997ko ekainaren 18an egin bilkuran erregelamenduaren araberako gehiengoaz hasiera batez onetsia.

Lekunberrin, mila bederatziehun eta lauretan hogeita hamazazpiko ekainaren hemeretzian. Alkatea, José María Ayerdi Fernández de Barrena.

LEKUNBERRIKO ALDE ZAHARRA ZAHARBERRITZEKO ORDENANTZA

1. artikulua. Gizarte, kultura eta historia arloko arrazoiengatik eta guztien interesagatik, hiriko Alde Zaharra sustatzea da ordenantza honen xedea, alde zaharreko eraikinak zaharberritzeko jarduketei laguntza eta bultzada emanez.

2. art. Lekunberriko Alde Zaharra mugatzen duen lerroaren barnean dauden eraikinak zaharberritzeko egiten diren lanak dira ordenantza honen xedea. Lerro hori hirian indarra duten Udal Planean definituta dago, eta haien ordez hirigintza arloko bertze bitartekoren bat ezartzen bada, hartantxe ere bai.

3. art. Alde Zaharreko eraikinen jabeak izanen dira laguntzen onuradunak, baldintza hauek betetzen badituzte:

a) Lekunberriko Udalarekiko zerga betebeharrak eguneratuak izatea.

b) Herriko Etxean obra proiektu teknikoa eta egindako obrei dagozkien bi agiri hauek aurkeztea: "zaharberritze babestuaren behin-behineko kalifikazioa" eta "zaharberritze babestuaren behin betiko kalifikazioa", biak Nafarroako Gobernuarenak.

4. art. Laguntza izanen da Eraikuntzen, instalazioen eta obren gaineko zergatik salbuestea jarduketak eraikinen kanpo aldean (estalkiak eta fatxadak) egiten badira, eta zerga beragatik %1 ordaintzea eraikuntza, instalazio edo obraren gainean, jarduketak eraikinen barnean egiten badira.

5. art. Laguntzen onuradun izateko eskabidea aurkeztuko da Herriko Etxean, eta harekin batean 3. artikuluan aipatu diren baldintzak beteko direlako zinpeko aitorpena.

6. art. Ordenantza honetan aurreikusten ez den orotan, Toki Administrazioari buruzko Foru Legean, Lurzoruari buruzko Foru Legean, Lurraldearen Antolamenduari eta Hirigintzari buruzko Legean eta horiekin bat heldu den gainerako araudian xedatutakoari jarraituko zaio.

7. art. Ordenantza honek Nafarroako ALDIZKARI OFIZIALean argitaratzen den egun berean hartuko du indarra.

Iragarkiaren kodea: A9706026